Christo Benadè

Vind jou rigting in die stilte!

2010-09-08T12:16:00.004+01:00

Josua 1
“8 Hierdie wetboek moet die rigsnoer wees vir alles wat jy sê. Oordink dit dag en nag en sorg dat jy alles uitvoer wat daarin geskryf staan. Dan sal jy slaag in wat jy moet doen, jy sal voorspoedig wees.”

As daar nou een ding waarmee ons almal meer kan doen is dit wysheid. Om net so bietjie verder as vandag te kan sien. Voor en nadele van Engeland, SA, hierdie of daardie werk. Ons maak lysies en weeg die voordele en nadele op, tog is die antwoorde nie duidelik nie.

Josua is in ’n baie soortgelyke situasie, hy neem oor by Moses as leier van die volk. Moses wat hierdie mitiese, groter as die lewe figuur is. Nou moet hy oorneem en die volk in die beloofde land inlei. As God hom roep dan begin Hy om vir Josua die nodige raad te gee vir sy taak. Sy raad is, oordink die wetboek (Bybel, in hierdie geval die eerste deel van die OT) dag en nag. Van die ander vertalings vertaal “oordink” met “meditasie”. Herkou, oordink, mediteer oor God se Woord, ’n aksie wat in die stilte gebeur. Dit is dan in hierdie oomblikke van stil besig wees met God se Woord wat ons toegang kry tot ’n onbeperkte bron van wysheid. Waar ons God se stem begin hoor, waar ons insig kry.

Die wêreld is honger vir eerlikheid

2009-04-23T14:27:00.007+01:00

Filippense 2 "4 Julle moenie net elkeen aan sy eie belange dink nie, maar ook aan dié van ander. 5 Dieselfde gesindheid moet in julle wees wat daar ook in Christus Jesus was: 6 Hy wat in die gestalte van God was, het sy bestaan op Godgelyke wyse nie beskou as iets waaraan Hy Hom moes vasklem nie, 7 maar Hy het Homself verneder deur die gestalte van 'n slaaf aan te neem en aan mense gelyk te word. En toe Hy as mens verskyn het, 8 het Hy Homself verder verneder. Hy was gehoorsaam tot in die dood, ja, die dood aan die kruis. 9 Daarom het God Hom ook tot die hoogste eer verhef en Hom die Naam gegee wat bo elke naam is, 10 sodat in die Naam van Jesus elkeen wat in die hemel en op die aarde en onder die aarde is, die knie sou buig,"

Die wêreld is honger vir eerlikheid

Die geweldige reaksie op die video van Susan Boyle op “Britain’s got talent” bevestig vir my weer die gedagte dat daar ‘n generasie mense is wat moeg is vir dit wat blink en aangeplak is. Daar is ‘n behoefte aan eerlike, outentieke mense, wat eerlik is oor hulle tekortkominge en hulself en ander aanvaar. Ons as kerk kan ook hieruit leer. Vir lank was die maatstaf waaraan die kerk gemeet is, hoe “entertaining”, professioneel en glad geolie die dienste en bedieninge was. Dit beïndruk nie meer nie - mense soek eerlikheid, selfs eerlikheid oor ons twyfel en worstelinge. Dit is ook wat die Here Jesus gedoen het. Hy kom nie as deel van ‘n goed georkestreerde plan wat foutloos verloop nie. Nee, Hy word gebore in ‘n stal wat sleg ruik, Hy eet saam met sondaars, was voete, is benoud, ly, word op gespoeg en geslaan.
Groete

Susan se video
http://www.youtube.com/watch?v=Il5TBgD9kHI

Waar is God die meeste?

2009-04-16T13:02:00.006+01:00

· Saterdagaand in die Pub saam met vriende?
· Sondagoggend in die Kerk?
1 Die aarde en alles wat daarop is, die wêreld en dié wat daar woon, alles behoort aan die Here,(Psalm 24)
Oor die jare heen het daar ‘n onderskeid in ons denke begin kom oor waar God is en waar Hy nie is nie, hoe ons optree waar God is en waar hy nie is nie. Ons trek anders aan as ons kerk toe gaan uit “respek” vir God(?), maar ons kan maar bid in die aand met net ‘n PT broek aan. Die skeiding het verder gegaan in ons denke oor rolle wat mense in die gemeente speel. Daar is die predikant en die kerkraad en dan is daar die gewone gelowiges. As Jesus sy Koninkryk wil vestig dan kies Hy 12 “gewone mense” en vertrou Sy boodskap aan hulle toe. By God is daar nie belangriker mense as ander nie. Daar is nie geestelike en vleeslike dele van ons bestaan nie. God is net soveel deel van ons seksualiteit en werk as van ons stiltetyd. Begin God raaksien in elke situasie, soek sy wil in elke situasie.
Sondag is daar geen alternatiewe diens by ons nie, ek preek wel by Londonwyk die oggend en aand.
Ek het weer die musiek van Don Franciso ontdek - ek sit van sy video’s op my blog waarna julle kan gaan luister.

Liefde en groete.

Die fees van die ongesuurde brode.

2009-04-16T12:50:00.002+01:00

1 Korintiërs 5:6-8

6 Julle selfverheffing is nie mooi nie. Weet julle nie dat 'n bietjie suurdeeg die hele deeg deurtrek nie? 7 Verwyder dan die ou suurdeeg, sodat julle nuwe, ongesuurde deeg kan wees, en dit is julle ook werklik. Ons paaslam is immers geslag: dit is Christus. 8 Laat ons dan feesvier, nie met die ou suurdeeg of met die suurdeeg van onsedelikheid en ander sonde nie, maar met die ongesuurde brood van reinheid en waarheid.

God is besig met Sy groot plan met Israel. Hulle staan gereed om uit Egipte te vlug. Tydens die Pasga word 'n lam geslag en die bloed aan die deurkosyne gesmeer. God straf die Egiptenare vir hulle ongehoorsaamheid en spaar Sy volk. Die volgende dag begin hulle trek, hulle is vry. Hierdie is die eerste dag van 'n nuwe fase in die geskiedenis van die volk. A.g.v. die haas waarmee hulle weg is uit Egipte was daar nie tyd vir suurdeeg in die brode nie, dus eet hulle tydens die Pasga en die week daarna steeds die ongesuurde brode.

God stel 'n fees in waartydens hierdie geleentheid herdenk word. Die fees begin die dag na die Pasga en duur vir sewe dae. Die fees se naam verwys terug na hierdie ongesuurde brode. Die afwesigheid van suurdeeg kry later 'n groter simboliese waarde wanneer suurdeeg 'n sterk negatiewe waarde kry in die lewe van die volk. Hulle suurdeeg was nie te kry in 'n netjiese pakkie by Tesco nie, maar deel van gister se ou deeg is gebruik in vandag se brood. Die ongesuurde brode was 'n teken van 'n nuwe skoon begin. Hierdie was nie net 'n tyd vir geestelike skoonmaak nie, maar ook fisiese skoonmaak. Al die ou gis is uit die kombuis gegooi en die huis is skoongemaak. Die huise het klein venstertjies en deure gehad wat nie baie lig en lug ingelaat het nie. As die oortollige goed uitgegooi is, was daar weer spasie in die huis en het die lig en lug makliker ingekom. 'n Nuwe oop begin met baie lig in hulle huise en lewens. Sommige skrywers koppel die gebruik van “springclean” aan hierdie gebeure.

Dit is treffend dat as die Here Jesus 'n dag kies waarop hy opstaan, dan is dit juis die begin van die fees van die ongesuurde brode. Die Jode is besig om terug te dink aan hulle eerste dae van vryheid uit slawerny – Jesus bring vryheid van die sonde en dood. Jesus kom maak ons vry van die suurdeeg wat die res van ons lewe versuur.

Tydens hierdie tyd kan ons as gesin vir 'n week ongesuurde brode (wat by die meeste supermarkte te kry is) eet. As ons dit eet kan ons gesels oor die betekenis daarvan vir ons. Dit is ook 'n ideale geleentheid om na ons lewens en omgewing te kyk. Ons huise en lessenaars bietjie skoonmaak en uitgooi. Nie alleen ons fisiese omgewing nie, maar ook ons harte. Wat is daar van gister wat ons nog saam met ons dra? Hardnekkige sondes wat gewoontes geword het, skuldgevoelens, woede en haat. Al hierdie goed is die suurdeeg van die verlede wat ons lewe nou omkrap. Leef nuut, leef vry!

2009-04-04T12:33:00.003+01:00

Kultusse – Wolf in skaapsklere!

Titus 3
7 So is ons dan deur sy genade vrygespreek en het ons erfgename geword van die ewige lewe wat ons verwag. 8 Dit is 'n betroubare woord. Daarom wil ek hê dat jy van hierdie dinge met groot nadruk moet getuig, sodat dié wat tot geloof in God gekom het, hulle op goeie werk kan toelê, werk wat goed en nuttig is vir die mense. 9 Maar jy moet jou nie inlaat met dwase strydvrae en geslagsregisters en met getwis en stryery oor die wet van Moses nie, want dit is nutteloos en sinloos. 10 Met iemand wat na twee vermanings nog skeuring veroorsaak, moet jy niks te doen hê nie,11 omdat jy weet dat so 'n man op die verkeerde pad is. Deur sy sonde bring hy die oordeel oor homself.

Ek het die afgelope tyd baie vrae gekry oor geloofsgroepe wat mense onrustig maak. Alhoewel geloof die fondament van ons lewe is, is dit ook so dat sekere geloofsgroepe hierdie dimensie van ons lewe gebruik om mense te beheer. Kerke en geloofsgroepe is op ‘n spektrum. Aan die een kant is daar die grootste groep hoofstroom kerke waar vrye assosiasie die beginsel is. ‘n Besluit om deel te raak van so ‘n kerk is ‘n persoonlike besluit wat sonder dwang of emosionele druk moet plaasvind. Aan die ander kant van die spektrum is daar die volwaardige kultusse waar lede beheer word deur skuldgevoelens, emosionele manipulasie en sosiale druk.
Daar is ongelukkig tans groepe in London wat kenmerke vertoon van kultusse. Ons moet onderskei tussen die okulte en ‘n kultus. Okulte groepe, is groepe wat hulle besig hou met esoterese, paranormale praktyke soos bv. Satanisme. Hierdie groepe herken ons gewoonlik maklik aan hulle praktyke en rituele. Die meer gevaarlike groep is die kultusse omdat hulle in die meeste gevalle “goed, toegewyd, geestelik en christelik” lyk en as kerke bekend staan.
Hierdie groepe word deur die volgende gekenmerk.

1. Sterk outokratiese leier.
2. Eksklusiewe toegang tot die waarheid. (“Net ons verstaan die Bybel reg en al die ander is verkeerd”)
3. Sekere geloofpraktyke (Bv. doop, speek in tale, ens.) word verhef tot absolute voorwaardes vir geloof. Randsake in die Bybel word verskuif na kernsake. (Luister gerus na week 2 van Ware Noord preekreeks op die web)
4. Beheer is belangrik en alledaagse besluite wat lede neem word sterk bepaal deur die leierskap.
5. Isolasie – lede mag net kuier, trou en verhoudings hê met ander lede van die kulte. Indien ‘n vrou bv. trou met ‘n man uit ‘n ander kerk, word sy uitgeskuif uit die kulte.
6. Die groepe definieer hulle gewoonlik in terme van die ander kerke waarteen hulle is.
7. Baie druk word op lede geplaas om ‘n groot deel van hulle finansies aan die groep te gee.
8. Kritiek van die leierskap word glad nie geduld nie.
9. Alle sosiale bande word met ‘n persoon gebreek wat uit die groep beweeg.

Die kern van ons geloof wat wyd erken word, sy wortels van die vroegste tye het en deur die reformasie nuut bevestig is, kan opgesom word in die volgende frases:
Here Jesus Christus alleen. (Jesus betaal vir ons sondes deur Sy kruisdood.)
Geloof alleen. (Ons word deel van hierdie redding deur geloof alleen.)
Genade alleen. (Ons ontvang hierdie redding as ‘n geskenk van God.)
Bybel alleen. (God openbaar hom alleen deur sy Woord.)
In die Bybel lees ons van Jesus wat mense nader getrek het, wat ingetree het vir die vrou wat betrap is dat sy owerspel gepleeg het. Jesus manipuleer en dwing nooit, Hy is oop vir ander, luister en verwerp mense nie. Ons lees van genade, vrye genade wat ons ontvang, nie vir dit wat ons doen, die gawes wat ons het, of die geld wat ons gee nie.
Toets die geeste aan die Bybel, bid dat die Gees vir jou onderskeid sal gee, en as iets jou ongemaklik maak is daar gewoonlik ‘n rede. As julle al ervarings van sulke groepe gehad het hoor ek graag daarvan.

Lydenstyd, 'n tyd van Hoop!

2009-02-18T12:55:00.002Z

1 Korintiërs 15

2 Deur dié evangelie word julle ook gered as julle vashou aan die boodskap soos ek dit aan julle verkondig het. As julle aan iets anders vashou, het julle tevergeefs tot geloof gekom. 3 Die belangrikste wat ek aan julle oorgelewer het en wat ek ook ontvang het, is dit: Christus het vir ons sondes gesterf, volgens die Skrifte;4 Hy is begrawe en op die derde dag opgewek, volgens die Skrifte.5 Hy het aan Sefas verskyn, daarna aan die twaalf, 6 en daarna aan meer as vyf honderd broers tegelyk, van wie sommige al dood is maar die meeste nou nog lewe. 7 Daarna het Hy aan Jakobus verskyn en toe aan al die apostels. 8 Heel laaste het Hy ook aan my, die ontydig geborene, verskyn. 9 Ek is immers die geringste van die apostels en is nie werd om 'n apostel genoem te word nie, omdat ek die kerk van God vervolg het.
Volgende Woensdag begin Lydenstyd (Lent). In die geskiedenis van die kerk was lydenstyd baie belangriker as Kerstyd. Die fokus het die laaste eeu na Kerstyd geskuif met die kommersialisering van die tyd. Die hart en die hoop van ons geloof lê in lydenstyd. Lydenstyd begin met “Ash Wednesday”, wat volgende Woensdag die 25e is, en eindig die Saterdag na Goeie Vrydag. Hierdie is ‘n tyd waarin Christene dink aan die lyding en sterwe van ons Here Jesus Christus. ‘n Tyd waar ons bewus raak van God se liefde vir ons, dat hy sy enigste seun opgeoffer het vir ons. Gedurende lydenstyd offer Christene iets wat vir hulle belangrik is op, om ons te herinner aan die opoffering van die Here Jesus Christus. So byvoorbeeld kan ons besluit om niks koffie te drink of sjokolade te eet nie. Elke keer as ons lus raak vir koffie of sjokolade maak dit ons weer bewus wat vir ons gedoen is. Mag hierdie lydenstyd vir jou ‘n tyd van inspirasie en geloofsgroei wees.

Bono se inspirasie – Die Woord.

2009-02-11T10:22:00.007Z

Soos jy seker al deeglik bewus is, is ons besig met ons nuwe Campaign -Op soek na Ware Noord – ons soeke na die rol van God se Woord in ons lewens. Dit is teen hierdie agtergrond wat ek verstom gestaan het toe ek besef hoeveel van U2 (met Bono as hoofsanger) se liedere is geïnspireer deur Bybelgedeeltes. Tydens hulle Elevation tour het Bono telkens die volgende woorde herhaal. “What can I give back to God for the blessings he's poured out on me? I'll lift high the cup of salvation -- A toast to God! I'll pray in the name of God; I'll complete what I promised God I'd do, And I'll do it together with his people.”. Min mense het dadelik besef waar dit vandaan kom. Tog het ‘n paar Christene besef hy is besig om Psalm 116 aan te haal. Wat verder interessant is, is dat hy die gedeelte nie net sommer geparafraseer het nie, maar dat hy The Message (Eugene Peterson se vertaling) aanhaal. Hy het in verskeie onderhoude al verwys na die rol wat God se Woord in sy lewe speel. Hoe hy The Message vir sy sterwende pa voorgelees het. Daar meer as sestig verwysing na die Bybel is in hulle lirieke.
Hoe ongelooflik is God se Woord nie, God inspireer klein kindjie om Jesus in sy hartjie in te nooi asook ‘n superster soos Bono wat 140 miljoen albums verkoop het.
Die beste nuus is dat ek en jy ook hierdie Woord het. Dat ons geïnspireer, getroos en gered kan word deur die woord. Kom ons lees die Woord, oordink die Woord, skryf oor die Woord, sing oor die Woord, laat dit deel van ons DNA word, ons kompas na die Ware Noord.

Hieris 'n clip waar hy Psalm 116 aanhaal.

Khalil Gibran se wysheid

2009-02-09T10:43:00.002Z

Ek het hierdie clips raakgeloop op 'n SA Vriendin Nina Pool se facebook. Gibran se wysheid het nog altyd vir my baie beteken. Geniet dit

Vrouwen Aan De Macht

2009-01-28T17:33:00.001Z

In my pastorale werk met Suid Afrikaners in Brittanje het ŉ tema my getref wat te gereeld herhaal om te ignoreer. Aanvanklik het ek gedink ek verbeel my, maar met die tyd het te veel paartjies met huweliksprobleme voor my gesit waar die selfde tema na vore gekom het.

Stef Bos se lied oor hierdie fenomeen het my laat dink dit is ŉ verskynsel wat meer algemeen is as wat ons dink. In sy lied “Vroue aan de macht sing hy”:

De wissel van de wacht
Vrouwen aan de macht
De wissel van de wacht
Vrouwen aan de macht

De regering was gevallen
Voor de wet van vrouw'lijk schoon
De generaal bracht alleen nog maar
De kinderen naar school

My hele wese glo in gelyke regte vir manne en vroue. Vir lank het ek in Suid Afrika hard gespook om vroue hulle regmatige plek in die huwelik te gee. In Brittanje(ek vermoed al hoe meer in Suid Afrika ook) gebeur iets interessant, vrou wat onversorg, oor werk, sonder sekuriteit, uitgebrand en weerloos voel. Manne wie se ego gekrenk is, wat voel hulle kan nie goed genoeg vir hulle gesin sorg nie, wat versigtig is om leiding en standpunt in te neem.

Ons word groot met ŉ wêreldbeeld van ŉ pa wat die beter werk het, die meer geld verdien, die besluite neem. Die hele familie trek agter die beste werksgeleenthede vir pa aan. Ma se werk is opsioneel, sy kry nie die groot salaris nie, spandeer nie so baie tyd by die werk soos pa nie.
In Brittanje het hierdie prentjie egter verander. Baie Suid Afrikaanse paartjies kom hierheen op die vrou se werkspermit, sy verdien die groot salaris, sy werk die lang ure. Die man is in ŉ groot mate afhanklik van die vrou, hy kry werk waar sy werk kry. Die besluit om hierheen te kom was ŉ gesamentlike besluit, die praktyk van hierwees het egter ander implikasies.

In die Sosiale sielkunde word gepraat van ŉ persoon se sosiale mag. In Suid Afrika is die meeste sosiale mag by die man, vir baie gesinne in Brittanje is dit by die vrou. Die beginsel hiervan is nie ŉ probleem nie, maar ongelukkig lyk die praktyk nie so rooskleurig nie. Die simptome(soos reeds genoem) van hierdie probleem steek ongelukkig die onderliggende rede weg.

Die oplossing vir die probleem lê daarin om eerstens te erken dat dit bestaan. Dat baie SA mans se ego juis versterk word deur die feit dat húlle die versorger en onderhouer is van die familie, verder het elke vrou ŉ basies behoefte aan sekuriteit, veiligheid en versorging – ongeag hulle salaris, beroep of persoonlikheid. Verder moet die rolle in die verhouding duidelik uitgeklaar word, wie neem finale verantwoordelikheid vir die finansies, besluite oor motors, huise ens. Hierdie sake is gesamentlike besluite, maar iemand moet verantwoordelikheid daarvoor neem.
ŉ Huwelik is om saam op reis te wees, as een voel hy of sy raak agter verloor die huwelik. Efesiërs 5:21 sê “Wees uit eerbied vir Christus aan mekaar onderdanig.” As ons sensitief is vir mekaar se behoeftes maak dit nie meer saak wie die werkspermit het, of die groot salaris nie. Ons begin die Here se seën en versorging vir ons gesin raaksien en leef ons saam dankbaar teenoor Hom.

Ek sal graag julle reaksies wil hoor, ek vermoed dit kan jou dalk net ontstel? Skryf gerus!

Juis hierdie dinge moet ons doen en die ander nie nalaat nie.

2009-01-19T15:29:00.005Z

Matteus 23
23 "Ellende wag vir julle, skrifgeleerdes en Fariseërs, huigelaars! Julle gee tiendes van kruisement, anys en koljander, maar wat volgens die wet van God die swaarste weeg, laat julle na: geregtigheid, barmhartigheid en betroubaarheid. Juis hierdie dinge moet 'n mens doen en die ander nie nalaat nie. 24 Blinde leiers! Julle skep die muggie uit julle beker uit, maar julle sluk die kameel in.
(Foto van 'n dogterjie wat ek in Indië geneem het.)
Jesus het die gawe gehad om op wonderlike manier verhoudings te bou!
Hierdie is nie een van daardie geleenthede nie. Jesus is besig met sewe veroordelings van die fariseërs. Hy veroordeel hulle veral vir hulle inkonsekwente godsdiens. Hulle verabsoluteer sekere fasette van hulle geloof, en verwaarloos ander.
Hulle was baie behep met persoonlike heiligheid, die gee van tiendes tot in die ekstreme vorme(Kruisement, anys en koljander). Hulle het die persoonlike religieuse wette tot in die fynste besonderhede na gekom. Opsig self was dit nie ‘n probleem vir Jesus nie. Dit is vir Hom belangrik hoe ons verhouding met God lyk. Dit is vir Hom belangrik hoe ons leef, wat ons met ons geld doen, wat ons lees, dink en deelneem aan. Jesus sê vir hulle: daar is meer aan ‘n lewe van geloof as net ons persoonlike heiligheid. Hy sê dit baie sterk, Dit wat swaarder weeg laat julle na. Geregtigheid, Barmhartigheid en Betroubaarheid – God plaas ons in hierdie wêreld om heling te bring, om troos te bring, om geregtigheid te laat geskied. Jesus sê vir hulle: As julle na die tempel toe stap, draai julle, julle gesigte weg van arme langs die pad, julle laat toe dat mense onderdruk word en julle is nie betroubare getuies van my liefde nie.
Die wêreld stel nie belang in ons wonderlike geestelike ervarings nie, hoe ons die Here ervaar in ons lewes nie. Ons ervaring en boodskappe maak nie hulle honger stil nie, troos nie as hulle ly nie, bring nie hoop as hulle hopeloos is nie. Kom ons leef heilig skoon en regverdig, maar laat ons nie dit wat swaarder weeg verwaarloos nie – Geregtigheid, Barmhartigheid en Betroubaarheid.
Gebed
Vader dankie dat U ons vrymaak van ‘n klomp wette wat ons so besighou dat ons energie en tyd het vir niks anders nie. Help ons om verby ons eie lewens te kyk en ons taak in die wêreld rak te sien. Maak ons oe oop vir die wat ly. Gee ons ‘n hart vir die wêreld.

Amen.

Goeie Christenmense skree vir die Vrystaat?

2009-01-12T16:26:00.003Z

(Hierdie artikel het oorspronklik verkyn op http://www.ekerk.co.za/)

Elkeen van ons het ‘n storie wat ons lewe oorheers. Die storie vertel nie alleen iets oor ons verlede nie maar ook baie oor ons toekoms. Ons kan die stories ook beskryf as die brille waarmee ons na die lewe kyk. Die bril wat ons ophet bepaal dit wat ons sien, beleef en hoe ons dit interpreteer. Ons stories word die bril waardeur ons na die wêreld kyk. Hierdie stories veroorsaak dat niemand objektief na die realiteit kan kyk nie. Ek het grootgeword met die storie dat enige goeie Christenmens vir die Vrystaat skree. Noudat ek groot is, verstaan ek hoekom dit so moet wees. Hierdie storie van ‘n goeie Christenmens, bepaal my emosie as ek na ‘n rugbywedstryd kyk. Jy het moontlik met ‘n ander storie grootgeword - moontlik dat goeie Christenmense vir die Noord Transvaal of WP skree (behoede my daardie dag)!
Ongelukkig beïnvloed die stories waarmee ons lewe nie net ons sportvoorkeure nie, maar ook baie ernstiger fasette van ons lewe. Hoe ons oor onsself dink (Wat is my potensiaal? Is ek te vet?), hoe ek oor ander dink (Gaan my man my ook verkul?, Swartmense is mos baie anders as ons?), ens. Deur die geskiedenis is daar baie stories vertel wat lewe en dood stories geword het. Die Natzi’s vertel stories oor die Jode en duisende sterf. In Ruanda vertel die Hutus stories oor die Toetsies en duisende sterf. In Suid Afrika vertel die blanke mense stories oor die swartemense; swartmense vertel stories oor die blanke mense; Zulus vertel stories oor die Xhosas en andersom Die Xhosas vertel stories oor die kleurlingmense en andersom. Deur die stories vorm ons beelde van mekaar - wat in die meeste gevalle ver verwyderd is van die realiteit, maar hierdie stories word ons realiteit. Ons leef, neem besluite en reageer volgens hierdie (subjektiewe) realiteite.
Om te lewe volgens stories is ook niks nuut nie. Brian Mclaren vertel in sy boek Everything Must Change: Jesus, Global Crises, and a Revolution of Hope
van ses stories wat dominant was in Jesus se tyd.
1. Dominasie Storie ( Romeine glo hulle moet domineer om suksesvol te wees en vrede te handhaaf.)
2. Revolusie storie.(Die Jode aanvaar nie die dominasie nie en kom in opstand)
3. Reiniging storie.(Die fariseërs meen dat die volk ly weens die sondaars in hulle midde)
4. Viktimisasie storie.(Sommige mense beskou hulself as slagoffers wat geen sê het oor hulle eie toekoms nie)
5. Isolasie storie (Groepe soos die Esensers onttrek hulle van die “sondige” wêreld en leef net tussen die wat soos hulle dink)
6. Akkumulasie storie (Sommige Jode voel dat, om soveel as moontlik besittings op te gaar, al is waaroor hulle beheer het.)
In die volgende artikels gaan ons na hierdie stories kyk en vra hoe hierdie stories ook ons lewens beïnvloed. Ons gaan ook soek na die Groot storie, God se storie vir Sy volk, kerk en kinders.

Seën
Christo

Hoekom sukkel ek so om geestelik te groei?

2008-11-20T15:15:00.004Z

Dit is ‘n vraag wat ek my voortdurend afvra. Ons het al die goeie bedoelinge in die wêreld, maar die realiteit is dat dit nie so vinnig gebeur nie, dat ek terugslae ervaar. Mens kom op ‘n punt waar jy begin wonder wat is fout met my? Dit lyk dan so maklik vir ander? Dit is miskien die probleem - ons dink dit is maklik vir ander. Die realiteit is dat dit vir almal moeilik is en dat ons deur verskillende fases van groei gaan. Ek lees die week wat Rick Warrren skryf oor geestelike groei wat die proses mooi opsom. Almal sal nie dieselfde pas sal loop nie, maar dit gee vir ons wel ‘n aanduiding hoe ons pad kan loop.
PHASE 1: A DREAM - God gives you a dream; an idea, goal, or ambition. Every greataccomplishment first began as a God-given dream in someone’s mind. “God is able to do far more than we would ever dare to ask or even dream of—infinitely beyond our highest prayers, desires, thoughts, or hopes.” Eph. 3:20 (LB)
PHASE 2: DECISION- A dream is worthless until you decide to do something about it. For every 10 dreamers, there’s only 1 decision-maker. This is the moment of truth where you decide to invest your time, money, energy, and reputation and to let go of security. If you want to walk on water - you must get out of the boat “You must believe and not doubt... a double-minded man is unstable in all he does.” James 1:6+8 (GN)
PHASE 3: DELAY - There is ALWAYS a time lapse before your dream becomes reality. God uses a waiting period to teach us to trust Him. Remember, a delay is not a denial. Maturity is understanding the difference between “no” and “not yet.” God says, “These things I plan won’t happen right away. Slowly, steadily, surely, the time approaches when the vision will be fulfilled. If it seems slow, do not despair, for these things will surely come to pass. Just be patient! They will not be overdue a single day!” Hab. 2:3 (LB)
PHASE 4: DIFFICULTY- Now the problems start popping up. The 2 most common types: critics and circumstances. Don’t worry. It’s all a part of God’s plan. “At the present you may be temporarily harassed by all kinds of trials. This is no accident - it happens to prove your faith, which is infinitely more valuable than gold.” 1 Pet. 1:6-7 (Ph)
PHASE 5: DEADEND! - Your situation will deteriorate from difficult to IMPOSSIBLE! You are backed into a corner, you reach the end of your rope, it looks hopeless. Congratulations! You are on the edge of a miracle. Trust God. “At that time we were completely overwhelmed...in fact we told ourselves that this was the end. Yet we now believe we had this sense of impending disaster so that we might learn to trust, not in ourselves but in God who can raise the dead.” 2 Cor. 1:8-9 (Ph)
PHASE 6: DELIVERANCE! - God provides a supernatural answer. Miraculously, things fall into place! God loves to turn crucifixions into resurrections so you can see His greatness. “I expect the Lord to deliver me once again so I will see his goodness to me...” Ps. 2 7:13

Hier is 'n inspirerende video oor 'n pa se toewyding aan sy gestremde seun. Saam voltooi hulle talle maratons en ysterman kompetisies. Team Hoyt

Seën
Christo

Is tiendes oudtyds?

2008-11-18T19:16:00.004Z

Ek het ‘n vraag gekry van een van die selgroepe oor die gee van tiendes en dankoffers. Hulle het ‘n Bybelstudie van Bennie Mosterd behandel oor tiendes en dit het ‘n klompie vrae losgemaak by hulle. Hier is ‘n paar gedagtes van my kant wat ek aan hulle gegee het.

Daar is ‘n paar beginsels wat vir my uitstaan:
1. Ons moet verstaan wat genade is (Johannes 1:16 Uit sy oorvloed het ons almal genade op genade ontvang.)As ons verstaan wat ons alles ontvang het genade is, is ‘n lewe van dankbaarheid nie moeilik nie. Alles wat ons het is ‘n geskenk uit God se hand. Ek besef baie dat as ek dalk ‘n paar kilometer na enige kant toe gebore is, of as ek dalk swart was of nie die intellektuele vermoëns gehad het om te studeer nie (so kan ek aangaan) , sou my lewe baie anders gewees het. Nou het ek alles ontvang, ek het - ‘n goeie werk, ek het oorvloed, ek kan vir my gesin sorg en ook die voorreg hê om ‘n seën vir ander te wees. Dit is ook so dat ‘n mens die geleenthede moet gebruik wat jy kry. Dit vra jare se harde werk, maar die meerderheid mense in die wêreld kry nooit die geleentheid nie. As God vir ons ‘n tiende vra dan sê Hy eintlik: “My liefde vir jou is so groot, Ek gee vir jou in oorvloed en jy kan 90% vir jouself hou.”
2. Ons ontvang dit wat ons het (geloof, finansies, kennis, intelligensie) om ‘n seën vir die wêreld te wees. Ons maak ‘n groot fout as ons dink dat God ‘n gelowige seën net tot sy eie voordeel. As die Here my iets leer moet ek ander seën deur dit vir hulle te leer. As God my seën met finansies moet ek dit gebruik waar dit tot ‘n seën kan wees. (Genesis 18:18 Abraham sal tog 'n groot en sterk nasie word en in hom sal al die nasies van die aarde geseën word.) Dit is deel van die sin en betekenis wat ons op aarde ervaar. As ons hierdie element verwyder uit ons voorspoed dan raak die lewe leeg en sonder sin. Dit lei daartoe dat ons dan sin probeer soek in plesier, dwelm ens.
3. Die beginsel dat ons ‘n tiende moet gee aan die werk van die Here, kom op talle plekke in die Bybel voor. (Genesis 28:22; Levitikus27:30 30 "Een tiende van al die produkte van die land behoort aan die Here, of dit nou graan of vrugte is. Dit is aan die Here gewy.” ;Maleagi 3:10 “Bring die volle tiende na die voorraadkamer toe sodat daar iets te ete in my huis kan wees, en toets My hierin, sê die Here die Almagtige. Toets My of Ek nie die vensters van die hemel vir julle sal oopmaak en vir julle reën sal uitgiet, meer as wat julle kan gebruik nie. ”) Alhoewel die beginsel nie so baie in die Nuwe Testament voorkom nie, hef Jesus nêrens die beginsel op nie. Hy sê wel ons moet pasop vir ‘n wettiese verstaan van ‘n tiende. God verwag nie ‘n tiende van ‘n ongelowige nie. Dit is alleen ‘n reaksie van die wat die genade van ons Here Jesus verstaan. (Matteus 23:23 "Ellende wag vir julle, skrifgeleerdes en Fariseërs, huigelaars! Julle gee tiendes van kruisement, anys en koljander, maar wat volgens die wet van God die swaarste weeg, laat julle na: geregtigheid, barmhartigheid en betroubaarheid. Juis hierdie dinge moet 'n mens doen en die ander nie nalaat nie.) Die fariseër het die beginsel van ‘n tiende belaglik gemaak deur een koljanderkorrel en twee anyssade tempel toe te bring en verby die honger bedelaar te loop.
4. Ons moet nie verwag om meer te ontvang omdat ons baie gee nie. Tog is dit ook so dat God ons vertrou met wat ons het. As ons getrou is daarmee vertrou Hy ons met meer. Hy gee sy middele vir die wat sy Koninkryk die beste dien.
5. Die gesindheid waarmee ons gee is ook belangrik. Is dit onder dwang of uit dankbaarheid? (2 Korintiërs 9 "Elkeen moet gee soos hy hom in sy hart voorgeneem het, nie met teensin of uit dwang nie, want God het die blymoedige gewer lief.")
Hierdie is so paar gedagtes soos ek persoonlik dit verstaan. Ek besef ook dat ek nie die volle waarheid het nie en dus soek ons maar saam. Ek sal graag julle gedagtes oor die beginsel van Tiendes wil hoor.

Seën
Christo

Die mense wat my irriteer!

2008-11-15T10:44:00.005Z

Wie is daar wat jou vandag kwaai irriteer? Noem net die eerste tien op! Hoekom kan mense ons so irriteer? Hoe kry hulle dit reg om met spykerskoene op ons senuwee eindpunte te dans? Om spreekwoordelik met hulle naels oor ‘n swartbord te trek?
Soms verskil ons persoonlikhede, ander kere is hierdie irriterende siele ‘n spieël waar ons iets van ons self raaksien waarvan ons nie hou nie, of dalk omdat hulle ons konfronteer om anders te dink. Die beste manier om mense wat jou irriteer te verstaan, is om hulle beter te leer ken. Irritasie is in sy kern maar ‘n verhoudingsprobleem. Ek het een jaar ‘n irriterende tiener seun in my kategeseklas gehad, hy het al my slegte herinneringe aan irriterende tieners wat saam met my op skool was, wakker gemaak. Die enigste verskil was, ek was al groot en hy nog ‘n klein arrogante kêrel. Deur die jaar leer ek sy ouers ken, begin ek agterkom, dat sy ouers nie in ons kerk is nie, in geen kerk nie. Dat hy alleen begin kerk toe gaan het, dat hy self begin Sondagskool toe gaan het. Dat hy winter en somer kerk toe stap en geen ondersteuning van sy ouers kry nie. Sy huis was vol drankmisbruik en alkoholisme, tog kom hy kerk toe, tog wil hy die Here leer ken, tog wil hy groei en al waaraan ek kan dink is hoe hy my irriteer! Ek het begin besef hy is eintlik die engel in die huis, teen die agtergrond van sy huis het hy uit gestyg. My houding het teenoor hom begin verander, hy het nog dieselfde dinge gedoen, maar dit het my minder geïrriteer. Ek het sy hart leer ken, en tot vandag toe het ons nog kontak.
Romeine 15
1 Op ons wat sterk is in die geloof, rus die verpligting om die swakhede te verdra van dié wat nie sterk is nie. Ons moenie aan onsself dink nie: 2 elkeen van ons moet aan ons naaste dink en aan wat vir hom goed is en wat hom in die geloof kan opbou. 3 Christus het immers ook nie aan Homself gedink nie, inteendeel. Dit was met Hom soos daar geskrywe staan: "Die beledigings waarmee mense U beledig, het op My neergekom."

Seën

Christo

Die video wat ons gekyk het oor eksegese kan jy kry by:

http://www.scripturedirect.com/

Die program wat jy kan gebruik om die Bybel te ontleed kan jy kry by:

http://www.e-sword.net/index.html

2008-11-06T23:22:00.000Z

1 Petrus 1
3 Sy Goddelike krag het ons alles geskenk wat ons nodig het om te lewe en Hom te dien. Dit kom deurdat ons Hom ken wat ons geroep het deur sy heerlikheid en mag. 4 Deur dit te doen, het Hy ons die kosbaarste en allergrootste gawes geskenk wat Hy belowe het. Daardeur kan julle die verderf ontvlug wat deur begeerlikheid in die wêreld werksaam is, en deel kry aan die Goddelike natuur. 5 En juis om hierdie rede moet julle alles in die stryd werp om julle geloof te verryk met deugsaamheid, die deugsaamheid met kennis, 6 die kennis met selfbeheersing, die selfbeheersing met volharding, die volharding met godsvrug, 7 die godsvrug met liefde onder mekaar en die liefde onder mekaar met liefde vir alle mense.

Sondag is daar belydenisaflegging en nagmaal. Jong gelowiges gaan voor die hele gemeente bely dat hulle glo in die Here Jesus Christus. Ons as gemeente gaan saam met hulle die dood en die opstanding van ons Here Jesus Christus vier. Die jongmense begin ‘n geloofspad wat voltooi word die dag wanneer hulle by God gaan wees. Almal van ons is iewers op hierdie pad. ‘n Pad waar ons net een van twee moontlikhede het, of ons gaan groei in ons verhouding met Jesus Christus of ons gaan agteruit gaan. Hierdie groei is ook nie outomaties nie. Dit vra afhanklikheid en harde werk.
Petrus noem geestelike groei, “ om deel te kry aan die Goddelike natuur” m.a.w. om meer soos Christus te word. Om dit te doen moedig hy die gelowiges aan om:
1. Te groei in kennis van God (Bybel)
2. Te stry teen sonde in ons lewe (Selfbeheersing)
3. Meer die kenmerke van Christus te vertoon.(Deugsaamheid)
4. Te volhard in ons geloof (Ons hele lewe aan God toe te vertrou.
Ek sien uit om julle Sondag te sien.

Vrede

Amazing Grace

2008-11-05T18:23:00.001Z

Ek het oor die jare 'n groot liefde vir die Kelly Family ontwikkel. Toe ek hierdie weergawe van Amazing Grace raakloop het die eenlikheid van die lied my baie getref. Ek hoop jy geniet dit ook.

Genade en vrede vir jou!
Christo